០១
ភាពយន្ដ
ចាប់កំណើតនៅក្នុងទឹក។
ត្រូវបានលក់ទៅក្នុងភាពខ្មៅងងឹត។
នៅត្រង់ចំណុចដែលជាបេះដូងនៃប្រទេសកម្ពុជា ដែលភ្លៀងមូសុងបានធ្វើឲ្យជន់លិចវាលស្រែស្រូវទុំ ហើយសម្លេងខ្សឹបៗបន្លឺឡើងតាមដងទន្លេប្រាប់ពីអាថ៌កំបាំងតាំងពីយូរយារណាស់មកហើយ មានក្មេងប្រុសម្នាក់បានចាប់កំណើតមកយ៉ាងចម្លែកដោយមានចំណងយ៉ាងជិតស្និតជាមួយនឹងទឹក។ គាត់មានឈ្មោះថារិទ្ធី ប៉ុន្ដែពិភពលោកនឹងមកស្គាល់គាត់ក្នុងនាមថា “កូនត្រី”។
ជាក្មេងប្រុសដែលកើតនៅក្នុងទឹកជន់ បានធ្វើឲ្យរិទ្ធីអាចហែលទឺកបានយ៉ាងល្អ ប្រៀបដូចជាខ្យល់ដង្ហើមដែលឆ្លងកាត់ទៅរាងកាយអញ្ចឹង។ សម្រាប់គាត់ ទឹកគឺជាសេរីភាព ហើយវាប្រៀបដូចជាផ្ទះផងដែរ។
នៅពេលដែលជម្ងឺបានមកបៀតបៀនអ្នកផ្ទះរបស់ខ្លួន សមត្ថភាពពិសេសពីកំណើតរបស់គាត់បានប្រែក្លាយទៅជាទុក្ខទោសសម្រាប់គាត់ទៅវិញ។
គាត់ត្រូវបានគេលក់ដូចជាទំនិញ ដោយបុរសម្នាក់ដែលមានចិត្តសាហាវឃោរឃៅជ្រៅជាងបាតសមុទ្រទៅទៀត រិទ្ធីត្រូវបានឃា្លតចាកឆ្ងាយចេញពីទន្លេដែលតែងតែមានឈ្មោះរបស់គាត់ ហើយត្រូវរុញចូលទៅក្នុងសុបិន្ដដ៏អាក្រក់នៅមហាសមុទ្រ។
នៅទីនោះ មហាសមុទ្រមិនមែនជាជម្រកដ៏មានសុភមង្គលនោះទេ។
ប៉ុន្ដែវាប្រៀបបាននឹងកន្លែងបញ្ចុះសពដ៏គ្រោះថ្នាក់។
គាត់ត្រូវបានគេបង្ខំឲ្យមុជចូលទៅក្នុងមហាសមុទ្រដ៏សែនជ្រៅដែលមិនអាចមានក្មេងណាទៅបាន រិទ្ធីបានលិចលង់ចូលទៅក្នុងស្រមោលអន្ធកាលដែលចង់តែលេបត្របាក់គាត់បាត់់ទៅ ខណៈពេលដែលរាងកាយពោរពេញដោយភាពឈឺចាប់ ពន្លឺនៃជីវិតក៏ស្ទើរតែរលត់បាត់ទៅដូចគ្នា។ គាត់ត្រូវចុះទៅបាតសមុទ្រដើម្បីរាវរកទ្រព្យសម្បត្តិឲ្យថៅកែដែលសម្លឹងមើលឃើញតែប្រយោជន៍ និងការចំណេញ ហើយមិនខ្វល់ពីក្មេងៗដែលកំពុងលិចលង់ចូលទៅបាតសមុទ្រនោះទេ។
គ្រប់ដង្ហើមចេញ ស្ទើរតែបាត់បង់។
ហើយរាល់ការមុជចូលទៅក្នុងទឹក គឺសុទ្ធតែជាផ្លូវទៅរកភាពរលត់សូន្យសុងនៃជីវិត។
“រឿងកូនត្រី” មិនមែនជាភាពយន្ដគំនូរជីវចលធម្មតាប៉ុណ្ណោះទេ ប៉ុន្ដែវាគឺជារឿងនិទានខ្មែរដែលប្រកបទៅដោយជីវិតជីវ៉ា ចងក្រងឡើងតាមរយៈការរួមបញ្ចូលគ្នារវាងព្រេងនិទាន មេរៀននៃការលត់ដំក្ដីឈឺចាប់ និងគូរដោយសេចក្ដីសង្ឃឹមរបស់ជាតិសាសន៍មួយ ដែលតែងតែកែប្រែពីភាពឈឺចាប់វេទនាឲ្យក្លាយទៅជាភាពស្រស់ស្អាតនៃសិល្បៈ។
នេះជាសាច់រឿងរបស់ក្មេងប្រុសម្នាក់ដែលត្រូវបានមនុស្សមួយក្រុមប្រាប់ថាគាត់គ្មានតម្លៃ រូបរាងតូចទាបមិនសាកសម កើតមកជាកូនអ្នកក្រ និងចម្លែកពីអ្នកដទៃ ប៉ុន្ដែគាត់នៅតែតស៊ូ ពុះពារជំនះនូវការប្រមាថទាំងនោះក្នុងជម្រៅសមុទ្រដ៏សែនជ្រៅ។
ពីទឹកទន្លេមេគង្គដ៏សក្ដិសិទ្ធ…
រហូតចូលទៅដល់ស្រមោលអន្ធកាលដ៏ជ្រៅ ដែលសូម្បីតែពន្លឺក៏ស្ទើរតែមិនអាចជ្រៀបទៅដល់…
ដំណើរជីវិតរបស់គាត់ នឹងត្រូវបានគេជាន់ពន្លិចយ៉ាងជ្រៅ ប៉ុន្ដែគាត់នឹងរស់រានពីភាពអាក្រក់ទាំងនោះ។
@SkinnyFish.TheFilm
#ProudlyKhmer
ផលិតដោយ សមាគមហ្វារពន្លឺសិល្បៈ រួមជាមួយនឹងPhare Creative Studio
ក្រុងបាត់ដំបង ប្រទេសកម្ពុជា
ខ្សែភាពយន្តគំនូរជីវចលរយៈពេល ៩២ នាទីនេះ គឺជាព្រឹត្តិការណ៍ប្រវត្តិសាស្ត្រថ្មីមួយ មិនត្រឹមតែសម្រាប់ហ្វារប៉ុណ្ណោះទេ ប៉ុន្តែសម្រាប់អនាគតនៃសិល្បៈច្នៃប្រឌិតនៅកម្ពុជា។ វាបង្ហាញឱ្យពិភពលោកឃើញថា ស្នាដៃកម្រិតអន្តរជាតិ ពិតជាអាចបង្កើតឡើងនៅក្រុងបាត់ដំបង ដោយមានអត្តសញ្ញាណជាតិខ្មែរច្បាស់លាស់ និងមានភាពល្បីល្បាញដល់កម្រិតសកលលោក។
ចាប់តាំងពីការងារចុះជួយនៅតាមសហគមន៍ រហូតដល់សមិទ្ធផលភាពយន្តដ៏អស្ចារ្យដូចជា រឿងកូនត្រី ។ Phare Creative Studio នៅតែបន្តប្តេជ្ញាចិត្តចំពោះការពិតមួយថា៖ សិល្បៈមិនមែនត្រឹមតែជារបស់លម្អដែលមានសោភ័ណភាពប៉ុណ្ណោះទេ ប៉ុន្តែវាជាដង្ហើមនៃជីវិត។ ហើយនៅក្នុងប្រទេសកម្ពុជា សិល្បៈកំពុងដើរតួនាទីក្នុងការផ្លាស់ប្តូរទិដ្ឋភាពជាច្រើន។
០២
អំពីស្ទូឌីយ៉ូ
សាច់រឿងរបស់កម្ពុជា, ជះឥទ្ធិពលទៅកាន់សកលលោក, សិល្បៈដែលប្រកបទៅដោយមនសិការវិជ្ជាជីវៈ
Phare Creative Studio គឺជាស្ទូឌីយ៉ូរបស់ខ្មែរដែលផលិតនូវគំនូរជីវចល និងពហុប្រព័ន្ធផ្សព្វផ្សាយ ដែលមានទីតាំងនៅក្រុងបាត់ដំបង ប្រទេសកម្ពុជា។ នៅទីនេះពួកយើងបានធ្វើការរួមបញ្ចូលគ្នារវាង សិល្បៈ សកម្មភាពសង្គម និងនវានុវត្តន៍ ដើម្បីបង្កើតសិល្បៈឲ្យក្លាយទៅជាគម្រូនៃសហគ្រាសមួយប្រកបដោយភាពវិសេស។ ការរួមបញ្ចូលនេះផងដែរ បានក្លាយជាគោលបំណងដែលកំណត់ដោយស្ទូឌីយ៉ូ ដែលជាការពង្រីកសាច់រឿងនិទានឲ្យលើសពីដែនកំណត់ពាណិជ្ជកម្ម និងការប្រើប្រាស់ប្រព័ន្ធផ្សព្វផ្សាយប្រកបដោយភាពច្នៃប្រឌិត ដើម្បីជាកម្លាំងមួយអាចជួយអភិវឌ្ឍន៍សង្គម។
ជាមួយនឹងបទពិសោធន៍ជាង ១៦ឆ្នាំ ស្ទូឌីយ៉ូរបស់ពួកយើងមានជំនាញឯកទេសផ្នែកគំនូរជីវចល ភាពយន្ត គំនូររូបភាព ការរចនាក្រាហ្វិក និងការផលិតសំឡេង ដែលសុទ្ធសឹងតែត្រូវបានបង្កើតឡើងដើម្បីលើកកម្ពស់ការយល់ដឹង និងផ្ដល់ជាសំឡេងដល់អ្នកដែលមិនសូវទទួលបានការចាប់អារម្មណ៍នៅទូទាំងតំបន់អាស៊ីអាគ្នេយ៍ និងបណ្តាប្រទេសផ្សេងៗទៀត។ រាល់គម្រោងនីមួយៗ គឺជាការគាំទ្រដោយផ្ទាល់ទៅដល់អង្គការហ្វារពន្លឺសិល្បៈ ដែលជាអង្គការមិនស្វែងរកប្រាក់ចំណេញ ដែលបានផ្លាស់ប្តូរជីវិតយុវជនខ្មែររាប់ពាន់នាក់តាមរយៈការបណ្តុះបណ្តាលសិល្បៈវិជ្ជាជីវៈតាំងពីឆ្នាំ ១៩៩៦។ ក្រោមការដឹកនាំដោយពាក្យសន្យាថា «ផ្លាស់ប្តូរជីវិតតាមរយៈសិល្បៈ» ក្រុមការងារដែលមានជំនាញច្នៃប្រឌិតទាំង ១៨ នាក់របស់យើង ភាគច្រើនជាអតីតនិស្សិតនៃសាលាសិល្បៈសូនរូបរបស់ហ្វារ បានបង្ហាញឱ្យឃើញពីចក្ខុវិស័យនេះជារៀងរាល់ថ្ងៃ ដើម្បីធានាថាឧត្តមភាពនៃសិល្បៈ និងឥទ្ធិពលសង្គម គឺជាអ្វីដែលមិនអាចកាត់ផ្ដាច់ពីគ្នាបាន។
Phare Creative Studio បានសហការជាមួយបណ្តាអង្គការឈានមុខគេលើពិភពលោក រួមមាន UNDP, UNICEF, WHO, FAO, WaterAid, Oxfam និងកម្មវិធីស្បៀងអាហារពិភពលោក (WFP) ដើម្បីរៀបចំយុទ្ធសាស្ត្រទំនាក់ទំនងដែលផ្តោតលើមនុស្សជាចម្បង យុទ្ធនាការផ្លាស់ប្តូរសង្គម និងឥរិយាបថ (SBCC) និងការនិទានរឿងតាមរយៈរូបភាពដែលជំរុញឱ្យមានឥទ្ធិពលជាវិជ្ជមាន ដោយផ្សារភ្ជាប់យ៉ាងជ្រៅទៅនឹងការយល់ដឹងពីវប្បធម៌ និងការយល់ដឹងច្បាស់ពីសហគមន៍។
រឿងកូនត្រី៖ ស្នាដៃដ៏អស្ចារ្យនៃខ្សែភាពយន្តគំនូរជីវចលកម្ពុជា
ក្រោមការព្យាយាមអស់ពីកម្លាំងកាយចិត្តរបស់ស្ទូឌីយ៉ូបានធ្វើឲ្យសិល្បៈមានការរីកចម្រើន នោះគឺរឿង “កូនត្រី” ដែលជាភាពយន្តគំនូរជីវចលធំដំបូងបង្អស់របស់ហ្វារ និងជាសមិទ្ធផលដ៏អស្ចារ្យក្នុងប្រវត្តិសាស្ត្រភាពយន្តកម្ពុជា។ លើសពីភាពយន្ដគំនូរជីវចលធម្មតា “រឿងកូនត្រី” គឺជាស្មារតីរបស់ស្ទូឌីយ៉ូ៖ វាជាសាច់រឿងដែលបង្កប់នូវភាពស្រស់ស្អាតក្នុងរូបភាព និងអំណាចនៃអារម្មណ៍ ដែលចាប់កំណើតពីដងទន្លេមេគង្គ លត់ដំដោយក្ដីឈឺចាប់ និងសេចក្ដីសង្ឃឹម ហើយត្រូវបានផ្ដល់ជីវិតដោយសិល្បករខ្មែរ ដើម្បីប្រាប់ពីទិដ្ឋភាព និងរឿងរ៉ាវក្នុងប្រទេសកម្ពុជា។
០៣
ចក្ខុវិស័យ
ដើម្បីនាំយកវប្បធម៌ដ៏សម្បូរបែប និងសិល្បៈដ៏អស្ចារ្យរបស់កម្ពុជាទៅកាន់ពិភពលោក តាមរយៈការផលិតើសាច់រឿងដែលទាក់ទាញ និងការបង្កើតគំនូរជីវចលបែបច្នៃប្រឌិត
Phare Creative Studio ដំណើរការដោយមានជំនឿចិត្តថា រាល់សាច់រឿងដ៏អស្ចារ្យនីមួយៗ គឺជាគ្រាប់ពូជសម្រាប់បង្កើតសាច់រឿងបន្តបន្ទាប់ទៀត។ បេសកកម្មរបស់យើង គឺបង្ហាញវប្បធម៌ដ៏សម្បូរបែប និងសិល្បៈដ៏អស្ចារ្យរបស់កម្ពុជាទៅកាន់ពិភពលោក តាមរយៈការបង្កើតភាពយន្ដគំនូរជីវចលបែបទំនើប ព្រមទាំងជួយបណ្តុះបណ្តាលសិល្បករជំនាន់ក្រោយឱ្យបន្តកេរ្តិ៍ដំណែលនេះទៅមុខ។ ដោយយកភាពយន្តគំនូរជីវចល "កូនត្រី" ធ្វើជាគ្រឹះ ស្ទូឌីយ៉ូបានត្រៀមខ្លួនជាឈ្នាន់សម្រាប់គម្រោងអន្តរជាតិ និងខ្សែភាពយន្តគំនូរជីវចលដែលមានគុណភាព ដែលបង្កើតឡើងដោយស្នាដៃកូនខ្មែរ។ យើងមានចក្ខុវិស័យចង់ឃើញសិល្បៈខ្មែរទទួលបានការទទួលស្គាល់ជាសកល ហើយសហគមន៍មានការរីកចម្រើនលូតលាស់តាមរយៈការបង្ហាញនូវគំនិតបែបច្នៃប្រឌិត និងចង់ឃើញអ្នកនិពន្ធរឿងជំនាន់ក្រោយ បង្កើតកេរ្តិ៍ដំណែលភាពយន្តដ៏រឹងមាំមួយ ចេញពីបេះដូងនៃប្រទេសកម្ពុជា។